ຕາມຂ່າວ RCI: ວັນທີ 30 ສິງຫານີ້ ຢູ່ທີ່ປັກກິ່ງ, ທ່ານຫວາງສິຊ່ານ, ຮອງນາຍົກລັດຖະມົນຕີຈີນຊີ້ອອກວ່າ, ການຟື້ນຕົວຂອງເສດຖະກິດໂລກຍັງຈະບໍ່ ດຳເນີນໄປຢ່າງສະດວກ, ການຊຸກຍູ້ໃຫ້ເສດຖະກິດເຕີບໂຕຢ່າງແຂງແຮງ, ພັດທະນາແບບຍືນຍົງ ແລະ ສະໝ່ຳສະເໝີ ຍັງຄົງແມ່ນສິ່ງທ້າທາຍຮ່ວມທີ່ປະເທດຕ່າງໆຕ້ອງປະເຊີນໃນສະເພາະໜ້ານີ້.
ທ່ານຫວາງສິຊ່ານແມ່ນໃຫ້ທັດສະນະດັ່ງກ່າວ ໃນເວລາພົບປະກັບທ່ານຄຣິສໂຕເຟີ ບອນດ໊ ແລະ ທ່ານແຄຼ ເມັກ ຄາສກິວ, ສະມາຊິກວຸດທິສະພາສະຫະພັນຂອງລັດມີຊູຣີ ຂອງອາເມລິກາ. ທ່ານກ່າວວ່າ, ລັດຖະບານຈີນຈະພະຍາຍາມຊຳລະແກ້ໄຂການພົວພັນລະຫວ່າງສາມດ້ານ, ຄື ການຮັກສາການພັດທະນາເສດຖະກິດຢ່າງໝັ້ນທ່ຽງແລະອ່າວໄວ, ການປັບປຸງໂຄງປະກອບເສດຖະກິດ ແລະ ການຄຸ້ມຄອງໄພເງິນເຟີ້ທີ່ອາດຈະເກີດຂຶ້ນ. ທ່ານກ່າວເນັ້ນວ່າ, ການພົວພັນດ້ານເສດຖະກິດລະຫວ່າງຈີນກັບອາເມລິກາແມ່ນແໜ້ນແຟ້ນທີ່ສຸດ, ສອງຝ່າຍຄວນພະຍາຍາມຮ່ວມກັນ, ຕັ້ງໜ້າສ້າງບັນຍາກາດ ແລະ ສະພາບແວດລ້ອມທີ່ດີງາມ, ຮ່ວມກັນຊຸກຍູ້ການສ້າງການພົວພັນທີ່ຮ່ວມມືຢ່າງຕັ້ງໜ້າແລະຮອບດ້ານລະຫວ່າງຈີນກັບອາເມລິກາ.
ທ່ານບອນດ໊ ແລະ ທ່ານຄາສກິວກ່າວວ່າ, ການພົວພັນລະຫວ່າງຈີນອາເມລິກາສຳຄັນຫຼາຍ, ສອງປະເທດຄວນຮ່ວມກັນຕໍ່ຕ້ານລັດທິປົກປ້ອງການຄ້າ, ຍົກເລີກກຳແພງການຄ້າຢ່າງແທ້ຈິງ, ພະຍາຍາມຊຸກຍູ້ໃຫ້ການພົວພັນດ້ານເສດຖະກິດການຄ້າລະຫວ່າງຈີນກັບອາເມລິກາພັດທະນາຢ່າງປອດໃສ.
ຕອນຄ່ຳວັນທີ 28 ສິງຫານີ້ ,ຢູ່ທີ່ນະຄອນຫຼວງປັກກິ່ງ,ການເຈລະຈາເສດຖະກິດລະດັບສູງຈີນກັບຍີ່ປຸ່ນຄັ້ງທີ 3 ທີ່ທ່ານຫວາງສີຊ່ານ,ຮອງນາຍົກລັດຖະມົນຕີຈີນແລະທ່ານກາຊູຢາ ໂອກາດະ,ລັດຖະມົນຕີວ່າການກະຊວງການຕ່າງປະເທດຍີ່ປຸ່ນ ເປັນປະທານຮ່ວມກັນ ໄດ້ອັດລົງດ້ວຍຜົນສຳເລັດອັນຈົບງາມ, ສອງຝ່າຍລົງເລິກຫາລືຫົວຂໍ້ທີ່ມີລັກສະນະມະຫາພາກ ຍຸດທະສາດແລະໄລຍະຍາວທີ່ກ່ຽວພັນເຖິງການຮ່ວມມືດ້ານເສດຖະກິດລະຫວ່າງສອງປະເທດ. ວັນທີ 29 ສິງຫານີ້, ໃນເວລາທ່ານຈັ່ງຈີ້ເຟີ່ງ,ຫົວຫນ້າຫ້ອງການຄົ້ນຄວ້າເສດຖະກິດຂອງສະຖາບັນຄົ້ນຄວ້າຍີ່ປຸ່ນຂອງສະພາບັນດິດວິທະຍາ ສາດສັງຄົມຈີນ ໃຫ້ສຳພາດຕໍ່ນັກຂ່າວຂອງວິທະຍຸສາກົນແຫ່ງປະເທດຈີນ,ທ່ານກ່າວວ່າ,ຄວາມຮັບຮູ້ທີ່ສຳຄັນແລະຫມາກຜົນລະອຽດທີ່ໄດ້ຮັບຈາກການສົນທະນາເທື່ອນີ້ມີບົດບາດສຳຄັນຕໍ່ການແກ້ໄຂບັນຫາທີ່ຄົງຄ້າງຢູ່ໃນການພົວພັນດ້ານເສດຖະກິດການຄ້າລະຫວ່າງຈີນກັບຍີ່ປຸ່ນ,ຊຸກຍູ້ໃຫ້ການຄ້າແລະການລົງທຶນລະຫວ່າງສອງຝ່າຍກ້າວໄປຫນ້າຕື່ມອີກ.
ໃນເວລາຕີລາຄາຫມາກຜົນຂອງການສົນທະນາເທື່ອນີ້, ທ່ານຈັ່ງຈີ່ເຟີ່ງ ຫົວຫນ້າຫ້ອງການຄົ້ນຄວ້າ ເຫັນວ່າ,ການສົນທະນາເທື່ອນີ້ໄດ້ຮັບຄວາມຄືບຫນ້າໃນສອງດ້ານຄື:
"ການພົວພັນເສດຖະກິດຈີນຍີ່ປຸ່ນແມ່ນມີທ່າອຽງທີ່ພັດທະນາຢ່າງປອດໃສ,ແລະມີຄວາມສຳຄັນທີ່ສຸດຕໍ່ສອງຝ່າຍທີ່ເພີ່ມການສົນທະນາລະດັບສູງໃຫ້ຫຼາຍຂຶ້ນ. ຖ້າເວົ້າສະເພາະການສົນທະນາເທື່ອນີ້ແລ້ວ,ຫມາກຜົນທີ່ຫນຶ່ງແມ່ນສອງຝ່າຍແລກປ່ຽນຄວາມຄິດຄວາມເຫັນໃນບັນຫາທີ່ສຳຄັນຈຳນວນຫນຶ່ງ,ແລະໄດ້ກ້າວເຖິງຂັ້ນມີຄວາມຄວາມທີ່ເປັນເອກະສັນກັນ,ອັນທີສອງກໍ່ແມ່ນຫມາກຜົນລະອຽດ,ໃນການສົນທະນາລະດັບສູງເທື່ອນີ້, ຈີນກັບຍີ່ປຸ່ນໄດ້ລົງນາມໃນສັນຍາຮ່ວມມື 7 ສະບັບ,ເຊິ່ງກ່ຽວພັນເຖິງຫຼາຍດ້ານ ເຊັ່ນ: ການຮ່ວມມືໃນຂົງເຂດສິ່ງແວດລ້ອມ,ອຸດສາຫະກຳ ການທະນາຄານ,ການອະນຸລັກປ່າໄມ້ແລະອື່ນໆ"
ການສົນທະນາເສດຖະກິດລະດັບສູງລະຫວ່າງຈີນກັບຍີ່ປຸ່ນເທື່ອນີ້ແມ່ນການສົນທະນາຄັ້ງທຳອິດກ່ຽວກັບການຮ່ວມມືໃນຂົງເຂດເສດຖະກິດພາຍຫຼັງລັດຖະບານຍີ່ປຸ່ນຊຸດໃໝ່ຂຶ້ນຮັບຕຳແໜ່ງໃນເດືອນມິຖຸນາປີນີ້, ເຈົ້າໜ້າທີ່ລະດັບສູງທີ່ຮັບຜິດຊອບວຽກງານ ເສດຖະກິດແລະການຕ່າງປະເທດຫຼາຍທ່ານຂອງລັດຖະບານສອງປະເທດໄດ້ຮ່ວມກັນເຂົ້າຮ່ວມ. ໃນການສົນທະນາ, ຈີນຍີ່ປຸ່ນໄດ້ແລກປ່ຽນທັດສະນະກັນຢ່າງກົງໄປກົງມາກ່ຽວກັບວິທີເຮັດໃຫ້ເສດຖະກິດຟື້ນຕົວຂຶ້ນ, ການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ການຮ່ວມມືໃນພາກພື້ນແລະສາກົນເປັນຕົ້ນ. ທ່ານວາງຊີຊ່ານ, ຮອງນາຍົກລັດຖະມົນຕີຈີນກ່າວວ່າ, ຕະຫຼາດຈີນມີກຳລັງແຮງບົ່ມຊ້ອນຢ່າງໃຫຍ່ຫຼວງ, ຈະເປີດປະຕູສູ່ພາຍນອກຢ່າງເດັດດ່ຽວ, ແລະສ້າງສະພາບແວດລ້ອມການລົງທຶນທີ່ດີໃຫ້ແກ່ບໍລິສັດຕ່າງປະເທດ. ຜູ້ຕາງໜ້າຂອງຍີ່ປຸ່ນໄດ້ຢືນຢັນວ່າການພົວພັນການຮ່ວມມືເພິ່ງພາແລະອາໄສກັນລະຫວ່າງຈີນກັບຍີ່ປຸ່ນນັບມື້ນັບໃກ້ຊິດຂຶ້ນ, ແລະຢາກໃຫ້ສ້າງການພົວພັນຮ່ວມມືຢ່າງໃກ້ຊິດກວ່າເກົ່າ.
ໃນເວລາສັງເກດການຂະຫຍາຍຕົວຂອງການພົວພັນດ້ານເສດຖະກິດການຄ້າລະຫວ່າງຈີນກັບຍີ່ປຸ່ນ, ທ່ານຈ່າງຈີ້ເຟີງເຫັນວ່າ, ການພົວພັນເສດຖະກິດການຄ້າລະຫວ່າງຈີນກັບຍີ່ປຸ່ນຍັງມີບັນຫາໃນສາມດ້ານ:
ເບິ່ງຈາກດ້ານການຄ້າສອງຝ່າຍແລ້ວເຫັນວ່າຍັງມີສະພາບແບບຂຶ້ນໆລົງໆເລື້ອຍໆ.ເພາະວ່າຍອດມູນຄ່າການຄ້າລະຫວ່າງຈີນແລະຍີ່ປຸ່ນແມ່ນຫລາຍທີ່ສຸດ,ຖ້າຢາກໃຫ້ມີການເຕີບໂຕຢ່າງໃຫຍ່ແມ່ນຍາກຫລາຍ,ຕົ້ນຕໍແມ່ນຍ້ອນວ່າສອງປະເທດມີບັນຫາໃນດ້ານໂຄງປະກອບການຄ້າ,ບໍ່ມີໂຄງການໃຫຍ່ທີ່ເປັນການຊັກນຳໄດ້.ບັນຫາທີສອງແມ່ນການລົງທຶນຂອງຍີ່ປຸ່ນທີ່ຢູ່ຈີນນັ້ນຫລຸດຫນ້ອຍລົງແລະຕົກຢູ່ໃນສະພາບຕ່ຳ.ບັນຫາທີສາມຄືໃນການຄ້າລະຫວ່າງຈີນຍີ່ປຸ່ນ,ການຂາດດຸນເປັນເວລາຍາວນານຂອງຝ່າຍຈີນ,ເຖິງວ່າບໍ່ໄດ້ຂົ່ມຂູ່ເຖິງການພົວພັນການຄ້າຈີນຍີ່ປຸ່ນກໍ່ຕາມ, ແຕ່ຖ້າສະພາບແນວນີ້ສືບຕໍ່ໄປກໍ່ຈະກະທົບເຖິງການຂະຫຍາຍຕົວຢ່າງປອດໄສຂອງການຄ້າຈີນແລະການພົວພັນດ້ານເສດຖະກິດລະຫວ່າງສອງປະເທດ.
ທ່ານຈ່າງຈີ້ເຟິ່ງເຫັນວ່າ,ການເຫັນດີຮ່ວມກັນທີ່ສອງຝ່າຍບັນລຸໄວ້ໃນການສົນທະນາເທື່ອນີ້ຈະມີຜົນດີຕໍ່ການແກ້ໄຂບັນຫາທີ່ມີຢູ່ໃນການພົວພັນເສດຖະກິດການຄ້າລະຫວ່າງສອງປະເທດ.ທ່ານກ່າວວ່າ:
ການສົນທະນາລະດັບສູງທາງດ້ານເສດຖະກິດຈີນຍີ່ປຸ່ນເທື່ອນີ້ກ່ອນອື່ນແມ່ນເຈົ້າຫນ້າທີ່ລະດັບສູງສຸດຂອງສອງປະເທດໄດ້ມີຄວາມຮັບຮູ້ທີ່ເປັນເອກະສັນກັນ,ອັນໄດ້ສ້າງເງື່ອນໄຂທີ່ດີໃຫ້ແກ່ການແກ້ໄຂບັນຫາລະອຽດ,ສອງຝ່າຍລ້ວນແຕ່ມີຄວາມປາຖະຫນາທີ່ຊຸກຍູ້ການຄ້າສອງຝ່າຍແລະການລົງທຶນຂອງສອງຝ່າຍຂະຫຍາຍຕົວຕື່ມອີກ,ເມື່ອມີບັນຍາກາດອັນດີຄືແນວນີ້ແລ້ວ, ກໍ່ຈະມີຜົນດີທີ່ສຸດຕໍ່ການຜ່ອນຄາຍແລະແກ້ໄຂບັນຫາເຫລົ່ານີ້.